بانكی ناوه‌ندی خستنه‌ڕوی دۆلاری بۆ ئه‌مڕۆ راگه‌یاند؛ گۆڕانكاری دروستكرد

بانكی ناوه‌ندی عێراق ئه‌مڕۆ چوارشه‌ممه‌ زیاتر له‌ 215 ملیۆن دۆلاری خستنه‌بازاڕه‌وه‌، به‌های دۆلاریش به‌رامبه‌ر به‌دینار له‌بازاڕه‌كانی ئاڵوگۆڕی دراو گۆڕانكاری به‌سه‌رهات و به‌های 100 دۆلار به‌رامبه‌ره‌ به‌ 153 هه‌زار و 600 دینار.

ئه‌مڕۆ چوارشه‌ممه‌ بانكی ناوه‌ندی عێراق رێژه‌ی خستنه‌ڕوی راگه‌یاند كه‌ 215 ملیۆن و 128 هه‌زار و 512 دۆلاری خستۆته‌بازاڕه‌وه‌، كه‌ 196 ملیۆن و 828 هه‌زار و 512 دۆلاری به‌شێوه‌ی حه‌واڵه‌، هه‌روه‌ها 18 ملیۆن و 300 هه‌زار دۆلاریشی به‌شێوه‌ی كاشه‌.

به‌های 100 دۆلار به‌رامبه‌ره‌ به‌ 153 هه‌زار و 600 دینار

به‌گوێره‌ی ئه‌و زانیاریانه‌ی له‌بازاڕی دۆلاره‌كه‌ی سلێمانیه‌وه‌ به‌ خه‌ندان دراون، به‌یانی ئه‌مڕۆ له‌كاتی كردنه‌وه‌ی بازاڕه‌كانی ئاڵوگۆڕی دراو به‌های 100 دۆلار به‌رامبه‌ر بو به‌ 154 هه‌زار دینار، به‌ڵام به‌هاكه‌ی به‌ناجێگیری ماوه‌ته‌وه‌ و به‌رده‌وامه‌ له‌ به‌رزبونه‌وه‌ و دابه‌زین، له‌ئێستادا به‌های 100 دۆلار به‌رامبه‌ره‌ به‌ 153 هه‌زار و 600 دینار.

ئێواره‌ی دوێنێ له‌كاتی داخستنی بازاڕه‌كانی ئاڵوگۆڕی دراو به‌های 100 دۆلار به‌رامبه‌ر بو به‌ 154 هه‌زار 100 دینار.

وه‌زاره‌تی دارایی عێراق ئه‌مڕۆ چوارشه‌ممه‌ ده‌ستپێكردنی ڕاسته‌وخۆی دابه‌شكردنی موچه‌ی فه‌رمانبه‌رانی بۆ مانگی (كانونی یه‌كه‌م/12)ی 2023 راگه‌یاند.

وه‌زاره‌تی دارایی له‌ راگه‌یه‌ندراوێكدا بڵاویكرده‌وه‌، به‌شی ژمێریاری وه‌زاره‌ته‌كه‌یان ڕێكاره‌كانی بۆ دابینكردنی پاره‌ی موچه‌ی فه‌رمانبه‌ران بۆ مانگی (كانونی یه‌كه‌م/12) ده‌ستیپێكردوه‌، دوای ته‌واوكردنی سه‌رجه‌م ڕێكاره‌كانی په‌یوه‌ست به‌ پرۆسه‌ی ڕێكخستنی خه‌رجكردن.

وه‌زاره‌تی دارایی داوای له‌ سه‌رجه‌م یه‌كه‌كانی خه‌رجكردن له‌ وه‌زاره‌ته‌كان و پارێزگا و لایه‌نه‌ په‌یوه‌ندیداره‌كان كردوه‌

به‌گوێره‌ی ڕاگه‌یه‌ندراوه‌كه‌، وه‌زاره‌تی دارایی داوای له‌ سه‌رجه‌م یه‌كه‌كانی خه‌رجكردن له‌ وه‌زاره‌ته‌كان و پارێزگا و لایه‌نه‌ په‌یوه‌ندیداره‌كان كردوه‌، پێداچونه‌وه‌ به‌ به‌ڕێوه‌به‌رایه‌تی ژمێریاری بكه‌ن بۆ ته‌واوكردنی ڕێكاره‌كانی دابینكردنی پاره‌ی موچه‌، به‌ له‌به‌رچاوگرتنی پابه‌ندبون به‌ مه‌رجه‌كانی دارایی مانگانه‌.

ئه‌وه‌ش له‌كاتێكدایه‌ له‌ئێستادا حكومه‌تی هه‌رێمی كوردستان سه‌رقاڵی دابه‌شكردنی موچه‌ی مانگی (ئه‌یلول/9)ی فه‌رمانبه‌رانه‌، تاوه‌كو ئێستاش به‌فه‌رمی هیچ واده‌یه‌ك بۆ دابه‌شكردنی موچه‌ی فه‌رمانبه‌ران بۆ مانگه‌كانی (تشرینی یه‌كه‌م/10، تشرینی دوه‌م/11، كانونی یه‌كه‌م/12) دیارینه‌كراوه‌.